2 Timothy 2
1Tua ahi ciangin nang ka tapa aw, Christ Jesu sunga om hehpihna hangin thahat in. 2Teci mi tampi mai-ah ka gen na zaksa nate midangte zong a hilh thei dinga a cin, a muanhuai mite na kemsak in. 3Christ Jesu galkap hoih bangin haksatna kote hong thuakpih in. 4Galkap nasem mi kuamah in tangpi vai vasaipih loin amah a makaih mangpa a lungkimsak nuam hi. 5Tua mah tawh kibangin kidemna sunga kihel mi khat peuh in kidemna ngeinate zui a, a dem kei leh a gualzote ngah lukhu a ngah kei hi. 6Hahkattaka nasem, lokhopa in a gahte tang masa pen hi. 7Topa in hihte khempeuh a sungthu hong theisak ding ahi manin, kong thugen ngaihsun kik in. a 8 David suan le khak misi pana a kithosak Jesu Christ phawk gige in. 9Tualthat mawhna a nei khat banga kolbulhna ciang dong ka thuakna hih ka lungdamna-thu hang mah ahi hi. Ahi hangin Pasian thu kol a kibulh kei hi. 10Tua ahi manin Christ Jesu sunga om hot khiatna a tawntung minthanna tawh a ngah khawm nadingun tua a teelsate hangin na khempeuh ka thuak hi. b 11 Hih lai-ah a muantak thugen khat a om hi: Amah tawh i sih khawm leh,amah tawh i nungta khawm ding hi;
12 eite in i thuak leh,
amah tawh i uk khawm ding hi.
Amah leh amah kinial thei lo ahi manin amah i nial leh,
amah in zong eite hong nial ding hi; c
13 eite i muanhuai kei zongin,
amah a muanhuai den ding hi, d
ahang in, amah le amah a kinial thei kei hi.
Pasian Sansa Nasem Mi
14 Hih thute amaute phawksak kik den in. Thumalte peuh tawh kisai-a a kitot loh nadingun Pasian mai-ah amaute vauhilh in; tua in kimanna nei loin a ngai mite a siasak bek hi. 15Maizumna om lo thutak thu diktakin a zang a santak nasempa bangin, Pasian tunga na kipiak theih nadingin na hih theih tawpin hih in. 16Pasian thusimlohna, thu mawk gengen nate pel in. Bang hang hiam cih leh tua bang thu-a a uangte a pasian-mi kei semsem ding hi. 17Amau thuhilhna, a banmuat meima bangin kizel hi. Amaute lakah Hymenaeus le Philetus, 18thutak pana pialmangte kihel uh hi. Amaute in, “Thawhkikna tung khin ta hi,” ci uh a, pawlkhatte upna a siasak uh hi. 19Ahi zongin Pasian bulkippi kiptakin dinga, “Topa in ama aate a thei hi,” ▼▼2.19 Ms. 16:5 ( Septuagint en in)
cih le “Topa min a pulakte peuhmah in tatsiatna a taisan pelmawh ding uh hi,” ci-a kigelh tawh a tungah kiciamteh hi. f 20 Inn lianpi sungah ngun le kham tawh kibawl nate bek om lo a, sing le bellei tawh kibawl zong a om hi; pawlkhat a zatna thupi a, pawlkhatte a gina kei hi. 21Tua a nunung pen pana mi khat amah le amah a kisiansak leh a zatna a thupi-a vanzat siangtho suaka, a Pu adingin kimanna a nei na hoih peuhpeuh sem dinga kimang thei a suak hi. g 22 Khangno gitloh lunggulhnate taisan inla, lungsim singtho-a Topa a sam mite tawh thumaanna, upna, itna le lemna na delh in. 23A haihuai le thugina lo kiselnate in kitotna piangsak cih thei na hi manin tuate ah kikum kha kei in. 24Topa nasemte kuamah tawh kitawng peuhmah lo ding uh hi; tua sangsikin mikim tungah migi-in, thu hilh thei dinga, zakdah hau lo ding hi. 25Amah a langdote lungnemtakin lamlak pelmawh hen, Pasian in amaute kisiksakin kiheisak dinga thutak theihna ah a pi ding hi. 26Tua ciangin khua hong phawk ding uh a, ama deihna bang sem dinga sal-a a khawi dawimangpa thang pan a suakta ding uh hi. h
Copyright information for
ZomZIV